Сарғасқаев Сансызбай (1925 - 1995) Сарғасқаев Сансызбай (29.4.1925 ж.т., Жамбыл облысы, Красногор ауданы, Шарбақты селосы) - қазақ совет жазушысы, Ұлы Отан соғысына қатысқан. 1942 - 43 жылдары аудандық «Красногоршы» газетінде жауапты хатшы, 1949 - 72 жылдары «Қазақстан пионері», «Лениншіл жас» газеттерінде әдеби қызметкер, бөлім меңгерушісі, жауапты хатшы, редактор, «Жұлдыз» журналында жауапты хатшы болды. Көркем туындылары 1949 жылдан жариялана бастады. Шығармалары негізінен жас жеткіншектерге арналған. «Достар» (1952), «Бір отрядта» (1953), «Сәуленің жаңа достары» (1954), «Бір көшенің бойында» (1961), «Сынған тіс» (1963), «Шындық» (1964), «Көңілді балалар» (1966), «Тәмпіш қара» (1974) атты повестер мен әңгімелер жинақтарында жас жеткіншектердің ой - арманы, қоғамдық пайдалы істері, өнер - білімге деген құштарлығы, бір - біріне адалдығы, достық қарым - қатынасы суреттелген. Жаңашыл да жасампаз адамдар туралы «Ұстаз» (1979), «Сұлутөр» (1983) романдары жарық көрді. Оның кітаптарының бәрі мектеп оқушыларының тыныс - тіршілігінен сыр шертеді. Жазушының көптеген шығармалары орыс және басқа да туысқан халықтар тілдеріне аударылған. С.Сарғасқаев қазақ балалар әдебиетінің қаламы қайратты көрнекті өкілі ретінде өмірінің соңғы кездеріне дейін балалар баспасөзіне белсене атсалысып тұрды, жас әдебиетшілердің аяқтануына қамқорлық көрсетіп отырды. Қазақ Республикасының Жоғарғы Кеңесінің Грамотасымен наградталған. Әдебиеттер тізімі: Алғашқы асулар: Повестер. Балалар: Әңгімелер мен очерктер. Баланы жастан. Біз төртеу едік: Повесть. Бір отрядта: Повесть. Көңілді балалар: Повестер жинағы. Қағаз бен қалам: Әңгімелер мен мысалдар. Қайсар қыз: Повестер. Сұлутөр: Роман. Тәмпіш қара: Повестер.